Усогласување со ЕУ: Црна Гора од 1 ноември воведува визи за граѓаните на Русија, Белорусија и Турција

Владата на Црна Гора донесе одлука од 1 ноември 2026 година да воведе задолжителен визен режим за државјаните на Руската Федерација, Белорусија и Турција. Овој потег претставува дел од обврските на официјална Подгорица за целосно усогласување на националната визна политика со правилата на Европската Унија во рамките на пристапниот процес.

Раскинување на досегашните договори за безвизен режим

Одлуката стапува на сила со усвојувањето на Информацијата за потребата од откажување на меѓународните договори со овие три држави кои досега овозможуваа слободен влез на нивните граѓани. Со измените на Уредбата за визниот режим, државјаните на Русија, Белорусија и Турција ќе мора да поседуваат соодветна виза за влез, транзит и престој на територијата на Црна Гора.

„Со оглед на тоа што овие прашања досега беа регулирани со меѓународни договори склучени од Владата на Црна Гора, неопходно е да се преземат сите правни мерки насочени кон прекинување на нивната важност“, се наведува во официјалното образложение на црногорската влада.

Исклучок за турските дипломати и службени лица

Во однос на Република Турција, предвиден е специфичен режим. Властите во Подгорица ќе иницираат склучување на нов билатерален договор што ќе се однесува исклучиво на носителите на дипломатски, службени и специјални пасоши.

„Целта е во најголема можна мера да се обезбеди континуитет на безвизниот режим за овие категории службени лица. Ваквиот потег е во целосна согласност со европското законодавство (acquis communautaire), кое им овозможува на државите да предвидат олеснувања и ослободувања од барањето за виза за претставници на институциите“, појаснуваат од Владата.

Со оваа мерка, Црна Гора прави уште еден значаен чекор кон исполнување на критериумите од Поглавјето 24 и затворање на европските кластери во преговорите за полноправно членство во ЕУ.