„Бејби бум“ во Прилеп: 12 новороденчиња за само два дена

Вистинска радост завладеа во прилепската болница „Борка Талески“, откако во изминатите 48 часа е регистриран значителен пораст на бројот на новороденчиња. На Одделението за гинекологија и акушерство се случи вистински „бејби бум“, носејќи среќа за многу семејства во градот под Марковите кули.

Според информациите од болницата, само во последните десет часа на свет дошле седум бебиња, додека вкупниот број на новороденчиња во изминатите два дена изнесува 12.

Од менаџментот на ЈЗУ Општа болница со проширена дејност – Прилеп истакнаа дека овој интензивен бран на нови животи е најдобра потврда за професионалноста на медицинскиот персонал.

„Ова е потврда за посветената работа на тимовите од Одделението за гинекологија и акушерство и Одделението за неонатологија. Со многу љубов, грижа и висок степен на стручност, нашиот кадар се грижи за здравјето на мајките и нивните најмали“, посочуваат од прилепската болница.

Медицинскиот персонал упати искрени честитки до сите семејства за нивната најголема животна радост, посакувајќи им на новороденчињата здраво, среќно и безгрижно детство. Овој позитивен тренд е ретка и охрабрувачка вест која ја стопли јавноста во Прилеп и регионот.