ВЛЕН: Османи со Вучиќ договарал унапредување на положбата на Србите во Македонија

Коалицијата „ВЛЕН“ упати остри критики до Демократската унија за интеграција (ДУИ), обвинувајќи ги за лицемерие и лажна пропаганда во однос на нивните тврдења за наводно ширење на „српскиот свет“ во државата. Како доказ за своите тврдења, од ВЛЕН потсетуваат на средба одржана во 2021 година меѓу српскиот претседател Александар Вучиќ и тогашниот шеф на дипломатијата, Бујар Османи.

Од владејачката коалиција потенцираат дека ДУИ нема морално право да зборува за српско влијание, со оглед на тоа што официјалните документи од Белград откриваат сосема поинаква реалност за време на нивното владеење.

„Документите ја потопуваат пропагандата на ДУИ“

Според соопштението на ВЛЕН, официјалниот записник од средбата Вучиќ-Османи јасно покажува дека една од клучните теми на разговор била токму положбата на Србите во Северна Македонија.

„Со денови ДУИ изнесува неосновани обвинувања, обидувајќи се да нѐ етикетира со лажниот наратив за „српскиот свет“. Но, таа пропаганда исчезнува пред официјалните документи. Соопштението на Претседателството на Србија по средбата со Бујар Османи јасно потврдува дека се разговарало за ‘унапредување на положбата на Србите во Северна Македонија’“, велат од ВЛЕН.

Албанското прашање било во втор план?

Од коалицијата додаваат дека овој настан е само уште една потврда дека за ДУИ албанските интереси не биле приоритет додека биле на власт.

„Овој документ открива уште една вистина: за време на долгите години на власт, ДУИ никогаш го немаше албанското прашање како свој вистински приоритет, туку се занимаваше со агенди кои денес се обидува да им ги припише на другите“, се додава во партиската реакција.

Оваа меѓупартиска престрелка е продолжение на заострената реторика меѓу албанскиот владин блок и опозициската ДУИ, која во изминатиот период постојано обвинува за дефакторизација на Албанците во новиот владин состав.