Глобален земјотрес во бизнисот со достава: Убер го купува „Глово“ за скоро 15 милијарди долари
Американскиот технолошки гигант „Убер“ (Uber) упати официјална понуда од 14,8 милијарди долари за преземање на германскиот лидер за достава на храна „Деливери Херо“ (Delivery Hero). Оваа стратешка аквизиција, која го вклучува и популарниот бренд „Глово“ (Glovo), најавува создавање на глобален доминатор во индустријата за достава на храна и превоз.
Според официјалното соопштение, Убер понудил 41,50 евра по акција, што е за 34 проценти повисока цена од просечната пазарна вредност на германската компанија во последните три месеци. Со оглед на тоа што Убер веќе поседува околу 25 проценти од акциите, понудата е условена со достигнување на праг од 50 проценти плус една акција.
Создавање на мрежа во 99 земји
Трансакцијата, која веќе е одобрена од управниот и надзорниот одбор на „Деливери Херо“, ќе резултира со платформа која покрива неверојатни 99 држави. Се проценува дека комбинираната вредност на испорачаната стока (GMV) до 2025 година ќе достигне 236 милијарди долари.
„Заедно, речиси ќе го удвоиме бројот на пазари на кои нудиме услуги за превоз и достава“, изјави извршниот директор на Убер, Дара Косровшахи. Со овој потег, Убер директно ќе му конкурира на кинескиот гигант „Меитуан“ (Meituan), кој моментално е лидер на азискиот пазар.
Гаранции за вработените и седиште во Берлин
Како дел од договорот, Убер се обврза на сериозни инвестиции на европско тло. Компанијата планира да вложи две милијарди долари во Германија до 2031 година. Дополнително, Убер гарантира дека седиштето на „Деливери Херо“ ќе остане во Берлин и дека вработените ќе бидат задржани на своите позиции барем до 2029 година.
„Приклучувањето со силен партнер во овој момент е вистинскиот потег за Delivery Hero, со што ќе се обезбеди нашата конкурентност во иднина“, истакна Кристин Скоген Лунд, шеф на надзорниот одбор на германската компанија.
Пречки од регулаторите
Иако договорот е на добар пат, се очекува тој да биде под строг надзор на регулаторните тела за заштита на конкуренцијата, особено во Европа и Латинска Америка каде двете компании имаат големо пазарно преклопување.
За да го олесни процесот, „Деливери Херо“ веќе се согласи да продаде делови од својот бизнис на 14 пазари на американската инвестициска фирма „SSW Partners“ за 1,4 милијарди евра. Холандскиот инвестициски гигант „Просус“ (Prosus), исто така, најави дека е подготвен да го продаде својот удел од 17 проценти во германската компанија.
Од Берлин до светскиот врв
„Деливери Херо“ е основана во Берлин во 2011 година и низ годините стана еден од најголемите глобални играчи преку серија аквизиции, меѓу кои најзначајна за нашиот регион е купувањето на шпански „Глово“. Убер, по успешните преземања на компании како „Постмејтс“, сега го користи својот капитал за целосно да го заокружи своето присуство на пазарите во Европа, Блискиот Исток и Азија.
Целосното финализирање на трансакцијата се очекува во втората половина на следната година.