ПЕНТАГОН ЈА ЗАПОЧНУВА ОПЕРАЦИЈАТА „ПРОЕКТ СЛОБОДА“: САД со мисија за деблокада на Ормутскиот теснец

Американскиот секретар за одбрана, Пит Хегсет, најави нова воена операција под името „Проект слобода“, чија примарна цел е заштита на трговските бродови од, како што наведе, иранската агресија во Ормутскиот теснец.

Хегсет на последната прес-конференција нагласи дека Соединетите Американски Држави „не бараат војна“, но подвлече дека Вашингтон нема да дозволи Техеран да го блокира меѓународниот воден пат и да ги загрозува невините земји и нивниот стоков промет. Шефот на Пентагон појасни дека оваа мисија е суштински различна од операцијата „Епски бес“, која беше активирана на 28 февруари.

Хуманитарна криза на отворено море

Одлуката за започнување на операцијата за ослободување на блокираните пловила следува по неделната најава на претседателот Доналд Трамп. Според американскиот претседател, воената интервенција е неопходна бидејќи на бродовите и на екипажот веќе им снемува храна, вода и основни намирници.

„САД започнуваат операција за ослободување на бродовите кои се под блокада во теснецот уште од почетокот на воените дејствија со Иран“, изјави претседателот Трамп.

Заглавени 2.000 бродови и 20.000 морнари

Сериозноста на ситуацијата ја потврдуваат и податоците на поморската агенција на Обединетите нации. Според нивните извештаи, во Ормутскиот теснец од 28 февруари се заробени околу 2.000 трговски бродови со вкупно 20.000 морнари.

Овој теснец е една од најкритичните точки за светската економија, со оглед на тоа што низ него поминува огромен процент од глобалниот транспорт на нафта и гас. Новата мисија на САД има за цел да го врати слободното движење на стоки и да ги заштити меѓународните води од понатамошни опструкции.