По една година од иницијативата: Паркот „Бановина“ во Лисиче преименуван во „Марко Јовановски“

По речиси една година од поднесувањето на официјалната иницијатива во општинскиот Совет, паркот во населбата Лисиче познат под името „Бановина“ и официјално доби нов назив – „Марко Јовановски“.

Одлуката на Општина Аеродром доаѓа како оддавање почит и траен спомен на Марко Јовановски, прерано починат жител на Лисиче и истакнат член на Ансамблот за народни игри и песни „Никола Јонков Вапцаров“, кој остави силен белег во промоцијата на македонскиот фолклор и културата во општината.

ВМРО-НП: Задоволни сме што паркот носи име на истакнат младинец 

Иницијативата за промена на името на паркот првично беше поднесена од советникот на ВМРО-Народна партија во Советот на Општина Аеродром, Даниел Самарџиски.

Поднесена иницијатива за преименување на паркот „Бановина“ во Лисиче

Иако нивниот првичен предлог беше просторот да го носи името „8-ми Септември“, од Општинскиот комитет на ВМРО-НП истакнуваат дека се исклучително задоволни од конечното решение на локалната самоуправа.

„Како единствени што ја покренаа оваа постапка, го поздравуваме усвоеното решение паркот да го носи името на Марко Јовановски – момче кое како активен дел од Ансамблот „Никола Јонков Вапцаров“ даде огромен придонес во афирмацијата на традицијата и достојно ја претставуваше својата општина и своето Лисиче“, истакнуваат од партијата.

Пофалби од жителите, но и критики за „дискретноста“ на процесот

Локалното население во Лисиче ја прифати одлуката со одобрување, оценувајќи дека парковите треба да оддаваат признание на заслужни сограѓани и позитивни примери од заедницата.

Сепак, дел од жителите упатуваат критики за начинот на кој беше соопштена веста. Според нив, општината постапила со непотребна воздржаност и со „штуро“ известување, што во јавноста отвори коментари дека локалната власт сакала да ја реализира промената без поголема помпа, со цел да се избегнат евентуални реакции поврзани со отстранувањето на историскиот назив „Бановина“.