ПЕКОЛ НАД ЗАПАДНА ЕВРОПА: Екстремниот топлотен бран однесе десетици жртви, енергетскиот систем во колапс

Западна Европа е под опсада на историски топлотен бран кој досега одзеде десетици животи, предизвика прекини во снабдувањето со струја и принуди затворање на училишта и институции. Метеоролозите предупредуваат дека екстремните температури, кои на места се и до 18 степени над просекот, ќе продолжат да растат до почетокот на следната недела.

Велика Британија и Франција бележат историски температурни рекорди за месец јуни. Во јужна Англија живата во термометарот се искачи на 36,1 степени, додека во Париз беше измерена рекордна температура од 40,9 степени. Ова доаѓа само еден ден откако Франција го регистрираше најтоплиот ден во изминатите 80 години, со неверојатни 44,3 Целзиусови степени измерени во југозападниот град Писос.

Трагични последици и црвен аларм во Италија

Трагични вести доаѓаат од Франција, каде властите потврдија дека најмалку 48 лица се удавиле обидувајќи се да се разладат во реките и езерата, а регистрирана е и смрт на две деца кои биле оставени во автомобил. Во Шпанија, две постари лица починаа од топлотен удар како последица на повеќедневните температури над 40 степени.

Во Италија, Министерството за здравство прогласи највисок степен на тревога во 16 градови, меѓу кои Рим, Милано, Фиренца и Торино. Врвот на топлотниот бран на Апенинскиот Полуостров се очекува помеѓу недела и понеделник.

Енергетски прекини и помор на живина

Екстремните горештини сериозно го погодија и енергетскиот сектор. Нуклеарните централи во Франција беа принудени да го намалат производството на електрична енергија за околу 7%, бидејќи високата температура на речната вода го оневозможува ефикасното ладење на реакторите.

Погодено е и земјоделството. Земјоделските здруженија во регионите Бретања и Пеи де ла Лоара известија за помор на стотици илјади птици на живинарските фарми, кои не ја издржале силната топлина.

Што го предизвика овој феномен?

Научниците објаснуваат дека овој топлотен бран е последица на специфичен метеоролошки модел познат како „Омега блок“. Овој феномен го добил името по грчката буква Омега, бидејќи притисокот се формира во тој облик, „заробувајќи“ ја врелата воздушна маса над одредени региони подолг период.

Климатолозите нагласуваат дека ваквите екстремни појави се директна последица на климатските промени, кои ги прават топлотните бранови почести, подолги и посмртоносни.