Влажни коловози и задолжителна зимска опрема: АМСМ апелира на претпазливост на патиштата

Сообраќајот на државните патишта утринава се одвива непречено, но коловозите на повеќето делници се претежно влажни, предупредуваат од Автомото сојузот на Македонија. Од 15 ноември стапи на сила законската обврска за задолжителна зимска опрема, а возачите кои нема да ја почитуваат ризикуваат казна од 45 евра.

9

Интензитетот на сообраќајот надвор од градските средини е умерен, додека на граничните премини од македонска страна нема подолги задржувања при влез и излез од државата, информираат од АМСМ. И покрај непреченото одвивање на сообраќајот, влажните коловози налагаат дополнителна внимателност, особено во утринските часови кога температурите се пониски и постои можност за појава на поледица.

Зимска опрема задолжителна до 15 март 2027

Од АМСМ потсетуваат дека од 15 ноември стапи на сила законската обврска за задолжително поседување зимска опрема во возилата, која ќе важи до 15 март 2027 година, без оглед на временските услови. Возачите кои нема да ја почитуваат оваа обврска ризикуваат парична казна од 45 евра во денарска противвредност, односно околу 2.770 денари.

Зголемена опасност од одрони на четири патни правци

Од Сојузот ги повикуваат возачите да ја прилагодат брзината на движење, да ја почитуваат сообраќајната сигнализација и да бидат особено внимателни при возење низ котлините, речните долини и клисурите, каде постои опасност од одрони.

Посебна претпазливост се препорачува на патните правци Катланово – Велес, Маврово – Дебар – Струга, Виница – Берово и Кочани – Делчево, каде теренот и временските услови создаваат зголемен ризик за безбедноста на сообраќајот.