СТРОГИ ПРАВИЛА ВО ЕВРОПА: Од 1 јули тахографите стануваат задолжителни и за комбиња до 3,5 тони

Европската Унија воведува значајни промени во секторот транспорт. Од 1 јули 2026 година, сите лесни комерцијални возила и комбиња со максимална дозволена тежина од 2,5 до 3,5 тони (вклучително и со приколка) ќе мора да бидат опремени со паметни тахографи од втората верзија на втората генерација (G2V2).

Оваа обврска се однесува на сите возила што учествуваат во меѓународен транспорт на стока или вршат каботажа во рамките на ЕУ.

Зошто се воведуваат „паметните“ тахографи?

Целта на новата регулатива е подобра контрола врз работното време на возачите и поголема транспарентност во меѓународниот превоз. Новите софистицирани уреди автоматски ќе ги регистрираат следните податоци:

• Секое преминување на државна граница;
• Точната локација и времето на утовар и истовар на стоката;
• Целосното работно време и задолжителните периоди на одмор за возачот.

Кој е изземен од оваа обврска?

Иако регулативата е опсежна, постојат одредени исклучоци. Тахографи не се потребни за:

• Транспорт на материјали за градилишта во радиус до 100 километри од базата на фирмата;
• Возила кои се користат исклучиво за некомерцијални (приватни) цели;
• Транспорт на специфична рачно изработена стока, под прецизно дефинирани услови.

Примена и надвор од границите на ЕУ

Новите сообраќајни правила ќе се применуваат на поширокиот европски континент. Покрај земјите членки на ЕУ, паметни тахографи ќе бараат и Швајцарија, Норвешка, Исланд, Лихтенштајн и Велика Британија.

Досегашната пракса предвидуваше задолжителни тахографи само за тешки товарни возила над 3,5 тони. Со оваа мерка, Брисел прави значаен чекор кон изедначување на правилата за сите учесници во комерцијалниот транспорт, со цел да се спречи нелојалната конкуренција и да се подигне нивото на безбедност на патиштата низ Европа.