Мицкоски: Претпоставувам дека институциите на Унгарија ќе излезат со некакво соопштение поврзано со заемот

„Претпоставувам дека институциите на Унгарија ќе си ја завршат својата работа и ќе излезат со некакво соопштение поврзано со тој заем. ​И второто потпрашање – дали се плашам? Апсолутно не се плашам, затоа што сето тоа е дел од нашето стратешко партнерство, потврдено од двата парламента и двете влади. Средствата се потрошени на транспарентен начин. Изразувам благодарност до Унгарија, која како наш стратешки партнер што во времето кога се боревме ја извадиме од банкрот државата поради долговите коишто ги наследивме од бандитската влада на СДСМ и ДУИ, беше прва која ни подаде рака“, рече Мицкоски одговарајќи на новинарски прашања по промоцијата на нови комунални возила за општините.

Мицкоски е убеден и дека изјавата на унгарскиот премиер Петер Маѓар дека Унгарија не поддржува забрзан процес на пристапување за ниту една земја-кандидатка во Европската Унија не се однесува на земјите од Западен Балкан, туку на други земји-кандидатки.

„Убеден сум дека колегата Маѓар тоа што го кажал не го мисли за Балканот, бидејќи досега откако е избран за претседател на Владата на нашиот стратешки партнер Унгарија, има неколку десетици изјави во кои вели дека поддршката за Западен Балкан, во кој географски припаѓаме и ние, за пристапување кон Европската Унија е недвосмислена и искрена и таа никогаш не била доведена под знак прашање. Мислам дека се однесува на други земји кандидати за членство во Европската Унија“, рече Мицкоски.

Маѓар денеска порача дека неговата земја не поддржува забрзано пристапување на Украина во Европската Унија, туку членство засновано на исполнување на критериумите, притоа посочувајќи ги земјите од Балканот што со години се на европскиот пат.