Владата со ултиматум до Китановиќ: Или повлекување на ставовите за Ратко Младиќ или оставка од функцијата

Владата на Република Македонија официјално се огради и ги оцени како целосно неприфатливи изјавите на директорот Далибор Китановиќ, со кои се глорифицира ликот на воениот командант Ратко Младиќ. Во официјален став даден за ТВ21, од „Илинденска“ нагласуваат дека владините позиции се темелат исклучиво врз меѓународно утврдените правни факти.

„Ратко Младиќ е правосилно осуден за геноцид, злосторства против човештвото и воени злосторства од страна на надлежниот меѓународен суд во Хаг. Ставот на Китановиќ е исклучиво негов личен став и како таков е апсолутно неприфатлив за Владата“, посочуваат од извршната власт.

„Волунтаризмот е недозволив – државниот интерес е пред сè“

Од Владата потенцираат дека државните политики се креираат врз основа на стратешкиот интерес на земјата и на сите нејзини граѓани, при што институционалниот став мора строго да го почитуваат сите именувани и избрани поединци во власта.

„Владата ги гради ставовите врз основа на интересот на државата и граѓаните. Кога таквиот став е изграден, тогаш истиот мора без исклучок да се почитува од страна на сите поединци во институциите. Политичкиот и институционален волунтаризам е недозволив“, децидни се од Владата.

Барање за итно повлекување на изјавата или заминување од функцијата

Поради сериозноста на нарушувањето на владиниот курс и меѓународниот углед на државата, Владата најави дека од Китановиќ ќе биде побарано јавно да го повлече својот спорен став.

„Доколку тој одбие да го стори тоа и не се согласува со официјалните политики на Владата, тогаш очекуваме Китановиќ веднаш да се повлече од раководната позиција што ја извршува“, порачуваат од владиниот кабинет.

Овој потег на „Илинденска“ доаѓа по силните реакции и барања од опозицијата и граѓанскиот сектор за утврдување на одговорност кај носителите на јавни функции кои отворено го релативизираат или глорифицираат геноцидот во Сребреница.