РЕВИЗИЈА ВО МЕПСО: Хаос со имотните листови на далекуводите и нереализирани инвестиции – под знак прашање и тарифата за струја

Сериозни слабости во управувањето со имотот, застарена сметководствена евиденција и низок степен на реализација на клучни инвестициски проекти утврди Државниот завод за ревизија (ДЗР) во АД МЕПСО. Најновиот извештај открива дека компанијата нема имотни листови за повеќе од половина од своите далекуводи, што директно влијае врз пресметката на тарифата за пренос на електрична енергија.

И покрај растот на приходите, ревизорите лоцираа алармантни состојби во внатрешното работење на државниот електропреносен оператор. Најголемиот проблем е лоциран во нерешениот правен статус на инфраструктурата. Од вкупно 112 далекуводи во државата, МЕПСО поседува имотни листови за само 53, додека преостанатите 59 далекуводи се водат со нерешен статус.

Слична е состојбата и со 33 трафостаници кои се во заедничка сопственост со ЕВН Македонија. Кај дел од нив, како сопственик е впишана само приватната компанија, додека МЕПСО допрва ќе треба да ги докажува своите права преку новоформирана работна група.

Како сметководствениот хаос влијае врз граѓаните?

Ревизорите предупредуваат дека поради лошата евиденција не може со сигурност да се утврди точната вредност на имотот на компанијата. Ова е клучно бидејќи токму врз основа на овие финансиски податоци се утврдува тарифата за пренос на струја, која е составен дел од сметките што ги плаќаат граѓаните. Доколку вредноста на имотот и амортизацијата не се точно пресметани, се доведува во прашање оправданоста на крајната цена на услугата.

Инвестиции „на хартија“ и проекти со зголемени трошоци

ДЗР нотира и сериозни пропусти во инвестицискиот циклус. Во последните 13 години, реализацијата на дел од проектите изнесува скромни 9 до 62 проценти. Ревизијата утврдила:

• Завршени проекти во вредност од 1,2 милиони евра кои со години не се ставени во употреба.
• Документација што недостасува за трошоци од 19 милиони денари.
• Неисплатена амортизација и нерегулирани расходи кои го искривуваат финансискиот резултат на друштвото.

Посебен акцент е ставен на проектот за ревитализација на далекуводот Скопје 4 – Велес. Тука вредноста на договорот енормно пораснала за дури 51 процент или за дополнителни 1,48 милиони евра, со што крајната сума достигнала 4,39 милиони евра.

Ревизорите препорачуваат итна стабилизација на сметководствените контроли и забрзување на постапките за запишување на имотот во Катастарот, со цел да се заштити државниот капитал и да се обезбеди транспарентно формирање на цените на енергетскиот пазар.