ПОЛИТИЧКО ОБЕДИНУВАЊЕ: Коалицијата „Вреди“ денеска се спојува во еден политички субјект
Коалицијата „Вреди“, која е дел од актуелното владејачко мнозинство, денеска во Скопје ќе одржи Конгрес за обединување, со што петте политички субјекти што ја сочинуваат ќе се трансформираат во едно заедничко политичко тело. Овој чин означува нова ера во политичкото делување на албанскиот блок во Македонија.
Конгресот ќе се одржи попладнево со почеток во 17:00 часот во салата на Филхармонија, каде се очекува присуство на над 805 делегати кои треба официјално да го потврдат процесот на фузија.
Програма на Конгресот
Според најавите од Организационата комисија, настанот е поделен на неколку клучни фази:
-
Свечен дел: Обраќања на домаќините и високи гости од политичкиот живот.
-
Лидерски изјави: Обраќања на лидерите на досегашните конституенти на коалицијата.
-
Работен дел: Формално гласање и усвојување на документите за новиот субјект.
„Одговорност кон граѓаните над партиските интереси“
Од „Вреди“ порачуваат дека одлуката за обединување е доказ за политичка зрелост и одговорност кон гласачите, нагласувајќи дека заедничкиот интерес е ставен над теснопартиските приоритети.
„Нашата политичка платформа се базира на десноцентристичка ориентација. Фокусот ќе биде ставен на реална еднаквост на Албанците во институциите, бескомпромисна борба против корупцијата, правна држава и суштинско спроведување на Охридскиот рамковен договор“, истакна вчера претставникот Дритон Сулејмани.
Стратешки цели
Новиот политички субјект најавува дека ќе делува како кохезивен фактор во власта, со силна евроатлантска ориентација. Обединувањето доаѓа по успешниот настап на изборите и влезот во Владата, со цел да се зајакне капацитетот за спроведување на ветените реформи и подобрување на статусот на Албанците, но и на сите граѓани во државата.
Исходот од денешниот конгрес и имињата на раководните структури на новиот субјект ќе бидат познати во текот на вечерните часови.