Лина Ѓорческа денеска го започнува настапот на УС Опен: Јапонката Хонтама прва пречка во квалификациите

Најдобрата македонска тенисерка, Лина Ѓорческа, денеска го започнува својот настап во квалификациите за последниот гранслем-турнир во сезоната – Отвореното првенство на САД (УС Опен) во Њујорк.

Ѓорческа во рамките на првото квалификациско коло за противничка ја има 26-годишната тенисерка од Јапонија, Маи Хонтама.

Јапонската претставничка во моментов се наоѓа на 171. позиција на најновата ВТА-ранглиста. Хонтама го бележи својот најдобар ранкинг во кариерата во август 2024 година, кога успеа да се искачи до 105. место на светот, што најавува сериозен и возбудлив тениски двобој на терените во „Флешинг Медоуз“.

Според официјалниот распоред на организаторот, натпреварот меѓу Ѓорческа и Хонтама е поставен како втор по ред на теренот број 16. Програмата на овој терен започнува во 17:00 часот по македонско време, што значи дека настапот на македонската тенисерка се очекува да стартува веднаш по завршувањето на првиот дуел.

Ѓорческа влегува мотивирана во квалификацискиот циклус, со цел да оствари три последователни победи кои би ја одвеле во главниот ждреб на престижниот њујоршки гренслем.