ВРЕДИ ДО ДУИ: Проблемот со имињата во Тетово е ваше наследство, престанете со протести и манипулации

Владејачката коалиција ВРЕДИ упати остри критики до Демократската унија за интеграција (ДУИ), обвинувајќи ја партијата на Али Ахмети за обид за дефокусирање на јавноста преку поттикнување тензии за прашања кои самите не успеале да ги решат со години. Според ВРЕДИ, паниката во редовите на ДУИ е резултат на стравот од соочување со одговорноста за лошото менаџирање со Тетово.

Од коалицијата ВРЕДИ сметаат дека денешните реакции на ДУИ се само обид за политизирање на процесот за преименување на улиците и плоштадите во Тетово, кој конечно добива институционална завршница. Тие потенцираат дека актуелниот проблем со имињата е директно „наследство“ од претходното неодговорно владеење на интегративците.

„Граѓаните знаат дека овој проблем не го создаде ВРЕДИ. Тоа е последица на долгогодишните пропусти на ДУИ. Наместо да ја прифатат вината, тие избираат да шират дезинформации. Ние остануваме посветени на решавање на ова прашање на законски начин и исклучиво во интерес на граѓаните на Тетово“, се наведува во партиската реакција.

Резултати наместо протести и пропаганда

Од ВРЕДИ порачуваат дека додека опозицијата троши енергија на организирање протести и партиска пропаганда, новата власт е фокусирана на конкретни проекти кои му се неопходни на градот.

„Времето за манипулации заврши. Тетово заслужува работа и опипливи резултати, а не политичка драма. Се обидоа да протестираат за правосудниот испит, а ние во меѓувреме го регулираме тој процес, заедно со уште 50 други испити. Протестираат за имињата – ќе ги регулираме и нив“, велат од коалицијата.

„Ќе ги решиме и нивните внатрепартиски проблеми“

Во соопштението со ироничен тон се коментира внатрешната состојба во ДУИ, со порака дека институционалниот ред ќе биде воспоставен во сите сфери.

„Тетово не смее повеќе да биде заложник на неуспесите на ДУИ. Ги советуваме да не протестираат ниту за сопствените внатрепартиски проблеми, бидејќи и тие на крајот ќе бидат регулирани преку воспоставување на систем на одговорност“, заклучуваат од ВРЕДИ.

Оваа последна пресметка меѓу политичките опоненти дополнително ги заострува односите во албанскиот блок, додека тетовци сè уште ја чекаат финалната правна разрешница за имињата на своите улици.