Костоски: Реконструкцијата на „Григор Прличев“ е доцнење и импровизација на штета на другите училишта

Советникот во Советот на Општина Охрид од редовите на ВМРО-Народна партија, Ванчо Костоски, упати остра реакција по одржаната 13-та седница, на која мнозинството усвои одлука за пренамена на средства наменети за основното училиште „Григор Прличев“. Костоски ги образложи причините поради кои опозицијата гласала „воздржано“, обвинувајќи ја локалната власт за лошо планирање и селективен пристап.

„Ветуваа нова зграда, а сега прават задоцнета реконструкција“

Костоски потсетува дека пет години наназад се ветувала изградба на потполно нова зграда за училиштето „Григор Прличев“ со образложение дека реконструкцијата не е економски исплатлива. Тој посочува дека сегашната одлука за реконструкција е во спротивност со досегашните тврдења, а тајмингот е крајно несоодветен.

„Реконструкција не се започнува една недела пред почетокот на учебната година. Ова требаше да започне уште во јуни, а вака се покажува целосно слабо планирање од страна на Општината“, вели Костоски.

Првачиња и гимназијалци во ист објект

Дополнителен проблем според Костоски е одлуката најмладите ученици да бидат префрлени во зградата на Гимназијата и тоа само во втора смена. Тој смета дека мешањето на првачиња со средношколци не е соодветно решение за образовниот процес.

Прелевање на средства од едно во друго училиште

Клучната забелешка на опозицијата е начинот на кој се обезбедени финансиите. Средствата кои сега се пренаменуваат за „Григор Прличев“ се одземени од ставката наменета за реконструкција на ОУ „Братство Единство“.

„Сметаме дека е недозволиво да се кратат средства од едно за сметка на друго училиште. Многу подобро ќе беше доколку општината скратеше од капитални инвестиции или спорт, наместо да ги одземе парите наменети за учениците од „Братство Единство“. Ова е само импровизација во образованието, а не вистинска грижа“, заклучува Костоски.