ЏУНЕЈТ РУШИД ПО ПОВОД ГОДИШНИНАТА ОД ГЕНОЦИДОТ ВО СРЕБРЕНИЦА: Наша заедничка одговорност е да извлечеме поуки и да не дозволиме заборавот да надвладее

Потпретседателот на Движењето за национално единство на Турците (ДНЕТ), Џунејт Рушид, денеска присуствуваше на официјалната комеморативна седница во Собранието по повод 31-годишнината од геноцидот во Сребреница. Во своето обраќање до јавноста, тој упати силна порака за зачувување на сеќавањето на жртвите како обврска на целото човештво кон мирот и правдата.

Комеморативната програма, која се одржа во македонскиот законодавен дом во организација на Бошњачкиот национален совет, ги собра политичките претставници и општествените чинители за да им оддадат почит на невините цивили кои ги загубија животите во еден од најцрните настани во поновата европска историја.

„Сребреница е голема трагедија што остави неизбришлива трага во совеста на човештвото. Со длабока тага и почит се поклонивме пред споменот на жртвите од геноцидот извршен во 1995 година. Да не ја заборавиме Сребреница, таа е наша заедничка одговорност“, изјави потпретседателот на ДНЕТ, Џунејт Рушид.

Тој нагласи дека колективната меморија не смее да избледи и дека историјата мора да служи како опомена за идните генерации.

„Наша морална обврска е да извлечеме поука од болките на минатото и решително да ги браниме мирот, правдата, човековите права и културата на заедничко живеење. Само така можеме да гарантираме дека омразата, дискриминацијата и геноцидот никогаш повеќе нема да се повторат“, потенцираше Рушид.

На крајот од своето обраќање, тој упати најискрено сочувство до семејствата на загинатите и до целиот бошњачки народ, заклучувајќи со зборовите: „Не заборавивме и нема да дозволиме да се заборави.“