ВМРО-ДПМНЕ со остри критики по укинувањето на пресудата за „Ласкарци“: 16 загинати, а сè уште нема одговорност

Владејачката партија ВМРО-ДПМНЕ преку официјално соопштение упати жестоки критики до правосудните органи, по одлуката на Врховниот суд да ја укине пресудата за тешката автобуска несреќа кај Ласкарци, во која животот го загубија 16 лица. Од партијата соопштуваат дека со оваа одлука уште еднаш се докажува дека во македонскиот правосуден систем изостанува правдата за најголемите национални трагедии.

Паралела со модуларната болница и случајот со Јакимовски

Во партиската реакција се прави директна паралела меѓу несреќата кај Ласкарци и пожарот во тетовската модуларна болница во кој изгореа 14 лица, посочувајќи дека и во двата случаи јавноста сè уште чека вистинска одговорност.

„16 лица загинаа, а нема одговорни. Исто како што во правосудниот систем нема одговорност и за запалената модуларна болница на Венко Филипче, каде живи гореа луѓе. Во која друга држава и при кое друго судство може да загинат над 30 луѓе, а да нема виновни?“, прашуваат од ВМРО-ДПМНЕ.

Дополнително, како аргумент за лошите состојби во судството, партијата го посочува и неодамнешниот случај со градоначалникот на Карпош, Стевчо Јакимовски. Од ВМРО-ДПМНЕ потенцираат дека Јакимовски, кој беше правосилно осуден за криминал, сега со одлука на Врховниот суд е пуштен на слобода.

Обвинувања за партиски влијанија врз Врховниот суд

Според владејачката партија, ваквите одлуки се директна последица на партиските влијанија врз судската власт што беа етаблирани во минатото.

„Ова е сè што треба да знаете за судството водено од ДУИ и СДС, со доверба од едвај 2 отсто кај граѓаните“, се вели во соопштението.

Од ВМРО-ДПМНЕ упатија директни критики и до Врховниот суд, како и до судијата Африм Фидани, оценувајќи дека донесената одлука нанесува сериозен срам врз правдата во земјата. Во соопштението се заклучува дека партиските инсталации на СДСМ и ДУИ во правосудниот систем се сè уште силно активни и работат на заштита на криминалот.