НОВИ КАДРИ ВО АНТИКОРУПЦИСКА: Собраниската комисија денеска го утврдува предлогот за членови на ДКСК
Собраниската Комисија за прашања на изборите и именувањата на денешната седница треба официјално да го соопшти предлогот за избор на нови членови на Државната комисија за спречување на корупцијата (ДКСК). Покрај антикорупционерите, пред пратениците ќе се најде и предлогот за нови членови на Државниот совет за превенција на детско престапништво и правда за деца, како и низа други кадровски и организациски прашања.
Катерина Зајковска со најмногу бодови за ДКСК
Според официјалните документи објавени на веб-страницата на Собранието, прворангирана кандидатка за нов член на Антикорупциската комисија е Катерина Зајковска, која на селекцијата освоила 90,67 бодови.
Комисијата за селекција при оценувањето истакнала дека Зајковска поседува богато искуство во борбата против корупцијата и спречувањето судир на интереси, како и дека понудила јасна визија за идното функционирање и работа на ДКСК. На листата, веднаш зад прворангираната Зајковска, следуваат кандидатите Милка Муратовска, Тања Левајковиќ и Владимир Клековски.
Кандидати за Советот за детско престапништво
На истата седница, Комисијата ќе расправа и за пријавените кандидати кои треба да го пополнат составот на Државниот совет за превенција на детско престапништво и правда за деца. За овие позиции конкурираат шестмина кандидати: Невена Петровска, Димитар Каракулев, Наташа Георгиева, Зоран Киткањ, Елена Георгиевска и Елена Мујоска Трпевска.
Рокади во комисиите и одбори за државни награди
Дневниот ред на Комисијата за избори и именувања опфаќа и прашања поврзани со внатрешната структура на Парламентот. Ќе се разгледуваат измените во составите на неколку собраниски комисии, кои се иницирани по барање на партијата ЗНАМ. Исто така, ќе бидат донесени одлуки поврзани со функционирањето на пратеничките групи за билатерална соработка со парламенти од други држави.
Седницата ќе биде заокружена со кадровски промени во одборите кои одлучуваат за доделување на високи државни признанија. Пратениците ќе расправаат по предлог-одлуките за разрешување и именување на нови претседатели и членови на одборите за државните награди „Мајка Тереза“, „22 Ноември“ и „Св. Климент Охридски“.