СДСМ обвинува: Мицкоски и ВМРО-ДПМНЕ ангажирале странска разузнавачка агенција за следење на опозицијата

Опозицискиот СДСМ упати сериозни обвинувања до премиерот Христијан Мицкоски и владејачката ВМРО-ДПМНЕ, тврдејќи дека ангажирале приватна израелска разузнавачка компанија за следење на политичките противници и креирање на вештачки афери.

Според партиското соопштение на СДСМ, станува збор за познатата израелска компанија „Блек кјуб“ (Black Cube), која во јавноста често се опишува како „приватен Мосад“.
Од СДСМ посочуваат дека оваа агенција е специјализирана за прибирање информации, тајно следење и спроведување на специјални операции насочени кон политичка дискредитација.

Од опозициската партија тврдат дека претставници на оваа компанија веќе престојувале во Скопје, каде што наводно оствариле средби во познат хотел. На овие состаноци, според СДСМ, присуствувале лица блиски до врвот на ВМРО-ДПМНЕ, како и бизнисмен кој требало да ја преземе улогата на финансиер на целиот ангажман.

„Целта на овој ангажман е јасна – следење на опозицијата, прибирање чувствителни податоци и фабрикување афери со цел директна дискредитација на СДСМ“, се наведува во партиското соопштение.

Обвинувања за „автократски модел“ на владеење

Од СДСМ сметаат дека ваквите чекори се показател за воведување на „автократски модел“ на владеење, каде што се користат приватни разузнавачки структури во моменти кога политичките механизми не ги даваат посакуваните резултати за власта. Според нив, овие активности се случуваат во период кога владејачката партија се соочува со пад на довербата кај граѓаните и сериозни предизвици во медиумскиот простор.

„Ваквите обиди за заплашување и компромитација нема да нè одвратат од политичката борба. Продолжуваме да инсистираме на вистината, независното правосудство и европскиот пат на државата“, порачуваат од СДСМ.

Засега нема официјален демант или коментар од Владата или од владејачката ВМРО-ДПМНЕ во врска со овие обвинувања на социјалдемократите.