Политичка криза на Косово: Курти не успеа да формира нова влада — можни вонредни избори

Лидерот на Демократската партија на Косово (ДПК), Мемљи Красниќи, денес изјави дека Албин Курти повеќе нема да биде премиер на Косово, откако неговиот предлог за состав на нова влада не доби доволно поддршка во Собранието.

На денешната седница, Курти доби 56 гласа, што е помалку од потребното мнозинство од 61 пратеник, со што не успеа да ја формира владата. Според Красниќи, Курти и неговото движење Самоопределување сносат директна одговорност за деветмесечната институционална криза што ја парализира државата.

Пратеничката на Демократскиот сојуз на Косово (ДСК), Хикмете Бајрами, изјави дека партијата ќе се фокусира на освојување на следните избори и формирање влада без Самоопределување, додавајќи дека опозицијата не е заинтересирана да формира влада во сегашните услови.

Лидерот на Социјалдемократската иницијатива, Фатмир Лимај, го оцени состојбата како „жална и загрижувачка“, истакнувајќи дека институциите се блокирани веќе осум месеци. Тој предупреди дека седницата се одржала „додека петиција е во Уставниот суд“, доведувајќи во прашање легитимноста на актуелното парламентарно мнозинство.

Од Српската листа, пратеникот Игор Симиќ порача дека нивната партија нема да го поддржи Курти, бидејќи неговата претходна влада донела „стотици лоши одлуки за српскиот народ“, што, според него, негативно се одразило и на Албанците.

Во меѓувреме, претседателката Вјоса Османи најави дека ќе ги повика сите партии на консултации, а доколку вториот мандатар не успее да формира влада во рок од 15 дена, ќе бидат распишани вонредни избори, кои мора да се одржат во рок од 40 дена.

Од Демократскиот институт на Косово (КДИ) порачаа дека политичката блокада и недостигот од дијалог се главните причини за кризата. Организацијата оцени дека вонредните избори се најреалното решение за враќање на стабилноста и довербата на граѓаните во институциите.