Сали: Не сме кренале раце од Изборниот и Кривичниот законик, преговорите за реформите продолжуваат

Политичките партии во земјата сè уште не се откажале од измените на Изборниот законик и покрај тоа што преговорите беа привремено блокирани и веќе помина крајниот рок за негово усвојување предвиден со европската Реформска агенда. Ова денеска го изјави министерот за европски прашања, Беким Сали, посочувајќи дека со промените на чело на Министерството за правда се прават нови напори за постигнување политички консензус.

„Како што е познато, тој закон беше начелно прифатен од повеќето политички субјекти во Собранието, но во последен момент две партии се повлекоа и не дадоа поддршка. По кадровските промени во Министерството за правда, веќе има нови иницијативи за негово усвојување, но процесот сè уште е во фаза на политички преговори“, појасни Сали.

Интензивна работа и на Кривичниот законик до декември

Прашан за судбината на новиот Кривичен законик – системски закон што континуирано се бара во сите извештаи на Европската комисија и за кој рокот истекува во декември годинава – Сали одговори потврдно, нагласувајќи ја посветеноста на ресорниот министер.

„Новиот министер за правда е целосно посветен и на Кривичниот законик. Станува збор за комплексни законски решенија кои бараат поширок политички и општествен консензус. Министерството активно работи и верувам дека ќе успееме да ја реализираме оваа зацртана цел“, истакна вицепремиерот.

Скопје домаќин на регионален форум за проширувањето

Овие изјави Сали ги даде пред почетокот на меѓурегионалната средба на главните преговарачи за евроинтеграции од земјите на Западен Балкан, Украина, Молдавија и Грузија, организирана во соработка со Германската амбасада и ГИЗ, а на која присуствуваа и претставници на Европската комисија.

На средбата беше порачано дека земјите аспиранти за членство мора значително да го забрзаат темпото на реформите преку тесна координација меѓу владите и парламентите. Сали нагласи дека Македонија е силно посветена на Реформската агенда и дека веќе се предложени околу 25 приоритетни мерки кои чекаат верификација од Брисел.

„Ние чекорите ги исполнуваме навремено и подготвени сме за преземање нови обврски. Комуникацијата меѓу Владата, Собранието, власта и опозицијата мора да биде координирана и унифицирана. Само со заеднички пристап можеме да се надеваме на побрзо постигнување на крајната цел – полноправно членство во ЕУ“, подвлече министерот.

Фон дер Лајен во октомври доаѓа во Скопје

Во контекст на најавените реформи за проширувањето кои новата еврокомесарка Марта Кос треба да ги презентира на 30 септември, Сали напомена дека нема олеснувања или кратенки на патот, туку фокусот е ставен на максимално забрзување на процесот кој трае предолго.

Тој ја потврди и претстојната дипломатска активност на врвот на ЕУ, најавувајќи дека претседателката на Европската комисија, Урсула фон дер Лајен, на почетокот на октомври ќе допатува во официјална посета на Скопје во рамки на нејзината редовна балканска турнеја.