УРБ-АРХ: Скопскиот земјотрес од 1963 година е лекција дека јавниот интерес мора да биде темел на урбаниот развој
По повод 63-годишнината од катастрофалниот земјотрес во Скопје, Организацијата за развој, заштита и промоција на урбанизмот, архитектурата и културното наследство, УРБ-АРХ, упати соопштение до јавноста. Оттаму потенцираат дека 26 јули не е само ден за тагување, туку и потсетник дека градовите мора да се градат како отпорни и живи системи.
Од организацијата истакнуваат дека историската обнова на Скопје по 1963 година го позиционираше градот како глобален симбол на меѓународната солидарност и визионерското модернистичко планирање.
Лекции од минатото за иднината на градот
„Многу од архитектонските и урбанистичките вредности создадени во периодот на повоената обнова и денес се клучниот столб кој го обликува идентитетот на Скопје. На овој ден се сеќаваме на жртвите, но и на лекциите што ни ги оставија претходните генерации“, велат од УРБ-АРХ.
Според нив, трите клучни столба за развој на Скопје мора да бидат:
- Квалитетно и професионално планирање;
- Отпорна инфраструктура способна да издржи природни катастрофи;
- Јавниот интерес како врвен приоритет пред профитот.
Повик за заштита на архитектонското наследството
Од УРБ-АРХ апелираат на поголема свест за зачувување на културното и архитектонското наследство кое потекнува токму од тој период на обнова. Тие порачуваат дека патот кон поодржлива и поотпорна иднина на Скопје води низ почитување на струката и континуирана адаптација на градот кон новите предизвици.
„Да го чуваме наследството и да градиме иднина во која безбедноста на граѓаните нема да биде компромитирана“, заклучуваат од организацијата.