ПРЕСМЕТКИ ПРЕКУ ИЗБОРНИОТ ЗАКОНИК: ВМРО-ДПМНЕ ги напаѓа рејтинзите на опозицијата, анкетите покажуваат тренд на опаѓање кај власта

Политичката војна околу измените на Изборниот законик (ИЗ) добива нова димензија. Додека ВМРО-ДПМНЕ ја обвинува опозицијата дека преку блокади го крие сопствениот низок рејтинг, најновите истражувања на јавното мислење сугерираат дека владејачката партија се соочува со првиот посериозен пад на поддршката, што фрла поинакво светло врз нивното инсистирање за електронско гласање на дијаспората.

Владејачката ВМРО-ДПМНЕ преку соопштение упати остри критики до СДСМ, Левица и ДУИ, тврдејќи дека нивните рејтинзи се на ниво на „статистичка грешка“ и дека тоа е единствената причина за опструкциите на новиот Изборен законик. Според партијата, Левица глуми непопустливост за да го консолидира членството, додека СДСМ „препишува“ од нив со поднесување на 10.000 амандмани под изговор дека електронското гласање на дијаспората е недемократско.

Што велат бројките на терен?

Иако ВМРО-ДПМНЕ настапува од позиција на моќ, последната анкета на агенцијата „Маркет вижн“ (спроведена од 10 до 27 јуни) открива интересни трендови. Партијата на премиерот Христијан Мицкоски и понатаму е во убедливо водство, но бележи пад од 3,5 проценти во споредба со март. Поддршката за ВМРО-ДПМНЕ се стопила од 24% на 20,5% за само три месеци.

Од друга страна, СДСМ, иако со скромни бројки, бележи благ раст. Од мартовските 4,9%, поддршката за социјалдемократите во јуни се искачила на 6,2%. Ова значи дека предноста на ВМРО-ДПМНЕ во однос на СДСМ, која во март изнесувала 4,8 преку 1, сега е намалена на 3,3 преку 1.

Личен рејтинг: Мицкоски во пад, Филипче во благ раст

Трендот на намалување не го заобиколи ниту премиерот Мицкоски. Довербата во него паднала од 25,2% во март на 23,3% во јуни. Спротивно на ова, новиот лидер на СДСМ, Венко Филипче, бележи подобрување на својот личен рејтинг од 3,6% на 5,1%.

Дијаспората како „појас за спасување“?

Аналитичарите сугерираат дека токму овие бројки можеби го објаснуваат неочекуваниот притисок на ВМРО-ДПМНЕ за итно воведување на електронско гласање за дијаспората. Иако маргината на грешка кај анкетите е +/- 3%, видливо е дека „медениот месец“ на новата власт завршува и партијата почнува да слегува од својот врв.

Вклучувањето на иселениците во изборниот процес по поедноставена процедура се толкува како стратешки маневар за обезбедување дополнителни гласови од категорија граѓани која традиционално е понаклонета кон десницата, со цел да се амортизира евентуалниот понатамошен пад на рејтингот на домашен терен.