СДСМ: „Тендер коалицијата“ на Мицкоски се распаѓа поради внатрешни војни за бизниси и фотелји

Опозицискиот СДСМ преку официјално соопштение упати сериозни обвинувања до владината коалиција, тврдејќи дека наместо работа во интерес на граѓаните, во моментов се случува „отворена тепачка“ за функции и бизнис влијанија меѓу коалициските партнери. Од партијата посочуваат дека стравот од истраги и празниот буџет се главните двигатели на внатрешните конфликти во Владата.

Според СДСМ, партијата ЗНАМ се соочува со внатрешен раскол предизвикан од конфликтот меѓу Максим Димитриевски и Горан Минчев. Опозицијата тврди дека Димитриевски инсистира на преземање на Министерството за земјоделство за „свој човек“, додека Минчев се противи на ваквиот потег бидејќи е свесен за скратените средства во овој ресор и големото незадоволство кај земјоделците.

Во соопштението посебно е истакнат министерот за правда, Игор Филков, за кој СДСМ тврди дека грчевито се држи до позицијата за да ги контролира истрагите и да ги спроведува планираните тендери.

„Стравот од одговорност и од идни истраги е она што го тера Филков да остане во Министерството за правда по секоја цена. Ова е слика на организирана група која се распаѓа одвнатре во моменти кога стравот од правдата расте“, стои во партиското соопштение.

Мицкоски бара алиби за предвремени избори?

Од СДСМ додаваат дека премиерот Христијан Мицкоски веќе бара изговори за распишување предвремени парламентарни избори поради алармантната состојба во државната каса.

„Буџетот е празен, а можностите за ново задолжување се исцрпуваат. Мицкоски не може да си дозволи да не ги исплати пензиите, па затоа ќе се обиде да се задолжи до максимум, а потоа ќе бара излез преку избори. Бидејќи не доби алиби од опозицијата, сега се обидува да го изнуди од сопствените коалициски партнери“, обвинуваат од опозицијата.

Според социјалдемократите, актуелната владина структура не е борба за подобра извршна власт, туку „борба за опстанок на криминална структура“ која ја губи контролата над институциите. СДСМ заклучува дека е време граѓаните да ја вратат власта во свои раце и да се стави крај на политичките манипулации.