ПРИВЕДЕНА СОПСТВЕНИЧКАТА НА КРАВИТЕ ОД КРИВА ПАЛАНКА: Познатата моделка уапсена поради спречување на инспекторите на АХВ

Полициски службеници од ОВР Крива Паланка вчера ја лишија од слобода 28-годишната Ј.Ѓ., сопственичка на стадото крави кои подолго време се во фокусот на јавноста. Приведувањето се случило кај месноста викана „Калин Камен“, откако младата жена физички и со отпор ги спречувала вработените од Агенцијата за храна и ветеринарство (АХВ) во нивната акција за заловување на крупниот добиток.

„На 20.05.2026 година, во 13:25 часот, полициски службеници ја лишија од слобода Ј.Ѓ. (28) од Крива Паланка, постапувајќи по претходна пријава за попречување на службени лица во вршење на нивните работни задачи“, соопштија од Министерството за внатрешни работи.

Ј.Ѓ. веднаш е спроведена во полициска станица, а по комплетно документирање на инцидентот, против неа ќе биде поднесена соодветна кривична пријава за спречување на службено лице во вршење службено дејствие.

Овој случај привлекува големо внимание кај граѓаните, не само поради долготрајниот проблем со добитокот кој се движи неконтролирано низ регионот, туку и поради идентитетот на сопственичката. Ј.Ѓ. е позната во јавноста како професионална моделка со успешна меѓународна кариера и повеќекратна добитничка на титули на избори за убавина.

Акцијата на АХВ следува по бројните поплаки од локалното население за штетите и безбедносниот ризик што го создаваат кравите кои без надзор опстојуваат на падините на Осоговските Планини.