Дарковска реагира: Средбата за буџетот во Прилеп била затворена за опозицијата и отворена само за ДПМНЕ
Прилепската советничка тврди дека градоначалникот свесно ги исклучил опозициските советници од јавната консултација за буџетот за 2027 година, претворајќи го процесот во партиски настан во просториите на општината.
Советничката од редовите на ВМРО-Народна партија во Советот на Општина Прилеп, Сузана Дарковска, излезе со остра реакција по јавната консултација за предлози за новиот општински буџет за 2027 година, која градоначалникот на Прилеп ја организираше во салата за седници на општината.
Селективни покани во јавна просторија
Според тврдењата на Дарковска, иако настанот бил претставен како отворена средба со граѓаните, поканите биле упатени исклучиво до членовите на ДПМНЕ од месните заедници и до советниците од владејачката партија. Опозициските советници, како што наведува таа, не добиле ниту покана, ниту каква било информација за одржувањето на средбата.
„Ова не е пропуст. Ова е намерна партиска окупација на јавниот процес. Буџетот на градот не е партиска каса на ДПМНЕ, туку пари на сите прилепчани – и на оние што гласале за ДПМНЕ, и на оние што гласале против, и на оние што воопшто не гласале“, порача Дарковска.
Обвинувања за клиентелизам и партизација на институциите
Советничката го окарактеризира потегот на градоначалникот како „класичен клиентелистички рефлекс” и обвини дека салата за седници, која е јавен имот финансиран од сите граѓани, била искористена како партиски простор.
„Ако навистина сакале предлози од граѓаните, ќе ги известиле сите – преку официјални канали, преку месните заедници без партиски филтер, преку советниците од сите опции. Наместо тоа, направија селективна покана и ја искористија јавната просторија како своја“, истакна Дарковска.
Таа додаде дека ваквото однесување нема никаква врска со транспарентноста, партиципативноста или почитувањето на институциите и го оцени како „чиста и безобѕирна партизација на институцијата”.
Барање за еднаков третман на сите граѓани
Дарковска на крајот потсети дека градоначалникот и владејачкото мнозинство се привремено избрани да управуваат со општината и дека опозицијата ќе продолжи да реагира секој пат кога јавните институции ќе се третираат како партиска сопственост.
„Граѓаните што не се членови на ДПМНЕ не се второразредни. Општината не е ваш штаб”, порача советничката.
Од Општина Прилеп и од кабинетот на градоначалникот засега нема одговор на реакциите на советничката Дарковска.