Трамп призна дека користи вештачка интелигенција, но крие за што: „Единствената заштитна ограда за технологијата сум јас“

Американскиот претседател Доналд Трамп откри дека лично користи вештачка интелигенција (ВИ) во своето секојдневие, но одби да открие за какви точно намени ја употребува оваа напредна технологија.

Во неформален разговор со новинарите во претседателскиот авион „Air Force One“, Трамп потврди дека се потпира на ВИ алатките истакнувајќи дека технологијата наоѓа примена „за многу работи“. Сепак, на директното прашање како конкретно ја користи, тој одговори кратко и мистериозно: „Епа, не сакам да ви го кажам тоа“.

„Ќе има повеќе добро отколку лошо“

Признанието на Трамп доаѓа во момент кога новинарите побараа став за неговото континуирано минимизирање на ризиците од неконтролираниот развој на вештачката интелигенција. Американскиот претседател целосно ги отфрли критиките, нагласувајќи дека потенцијалните придобивки се неспоредливо поголеми од можните опасности.

„Ќе има далеку повеќе добро отколку лошо, и тоа во огромна мера. Тоа го тврдам од самиот почеток. Оној што ќе победи во глобалната трка за вештачка интелигенција – а САД во моментов водат убедливо – тој победува во сè“, дециден беше Трамп.

„Заштитна ограда е паметен претседател со висок коефициент на интелигенција“

Својот став претседателот дополнително го разработи преку својата социјална мрежа „Truth Social“, каде што порача дека на Америка не и се потребни нови бирократски регулативи и ограничувања, бидејќи најголемиот заштитен механизам е токму тој самиот.

„Единствената контрола или „заштитни огради“ што и се потребни на вештачката интелигенција се СИЛЕН И ПАМЕТЕН (со висок коефициент на интелигенција!) ПРЕТСЕДАТЕЛ, а САД го имаат тоа во изобилство!“, напиша Трамп.

Тој директно го нападна коосновачот на водечката компанија „Антропик“ (Anthropic), Дарио Амодеи, тврдејќи дека неговата администрација претходно морала да ги „скротува“ технолошките магнати кои правеле сомнителни работи, додавајќи дека Амодеи сега „се преправа дека е совршено мало ангелче“.

Судир меѓу Белата куќа и Силиконската долина

Острите пораки од Трамп доаѓаат во момент кога лидерите на најголемите технолошки лаборатории бараат итна институционална сопирачка за најновите модели. Дарио Амодеи („Антропик“), Сем Алтман („ОпенАИ“) и Илон Маск („xAI“) неодамна се согласија дека развојот мора да се забави со цел да се воведат независни надворешни евалуатори и строги контроли.

Алармот кај инженерите и истражувачите се вклучи по серијата инциденти во кои системи со вештачка интелигенција покажаа способност автономно да пробиваат заштитни мрежи и да изведуваат сајбер-напади. Научниците предупредија дека без строг надзор, технологијата може да прерасне во егзистенцијален ризик за човештвото.

Сепак, Трамп тврди дека официјален Вашингтон веќе има доволно „кривична и регулаторна моќ“ врз технолошките компании, останувајќи на ставот дека наметнувањето дополнителни бариери само би му наштетило на американското лидерство во глобалната технолошка трка.