Учителката Соња Трифуновска од Тетово е прворангирана во Македонија за „Просветен работник на годината“

Соња Трифуновска, одделенска наставничка и наставник-советник во основното училиште „Гоце Делчев“ од Тетово, го освои првото место во државата на годинашниот избор за престижното признание „Просветен работник на годината во основно образование – одделенска настава“.

Ова државно признание традиционално го доделува Претседателството на Сојузот на просветните работници на Македонија, како вреднување на вонредниот труд, иновативноста и посветеноста на наставниот кадар во образовниот систем. Трифуновска воедно е и единствената наградена просветна работничка од Тетово во сите категории за учебната 2025/2026 година.

Труд кој го наоѓа патот до светлината

По добивањето на ова највисоко професионално признание, Трифуновска не го криеше своето задоволство и истакна дека оваа награда е круна на нејзината долгогодишна посветеност на учителската професија.

„Не може да се опише со зборови чувството кога сиот долгогодишен вложен труд и посветеност во професијата што од срце ја работам е вреднуван со највисоко признание. Голема благодарност до Сојузот на просветни работници на Македонија, како и до моето семејство, мојата учителка, моите ученици, нивните родители, директорката на училиштето, колегите и сите пријатели кои ја поддржуваат мојата работа. Оваа награда е доказ дека трудот, посветеноста и квалитетот секогаш го наоѓаат својот пат до светлината на денот. Таа ќе ми биде уште поголема мотивација и инспирација за нови предизвици во мојата најубава професија – учителската“, изјави Трифуновска.

Комплетен список на наградени просветни работници за учебната 2025/2026 година:

Претседателството на Сојузот на просветните работници ги објави лауреатите во сите четири клучни категории, како и едно постхумно признание:

I. Предучилишно воспитание

• Клементина Петрушевска, воспитувач во ЈДГ „Весели Цветови“, Општина Кисела Вода – Скопје.

II. Основно образование – одделенска настава

1. Соња Трифуновска (прворангирана), наставник-советник во ООУ „Гоце Делчев“ – Тетово;
2. Виолета Поповска, одделенски наставник во ООУ „Вера Јоциќ“ – Скопје;
3. Габриела Мерџаноска, одделенски наставник во ООУ „Гоце Делчев“ – Гостивар;
4. Ксенија Николова, наставник-советник во ООУ „Гоце Делчев“ – Босилово;
5. Весна Тодоровска Унковска, одделенски наставник во ООУ „Партеније Зографски“, Кисела Вода – Скопје.

III. Основно образование – предметна настава

1. Томе Китановски (биологија) во ООУ „Гоце Делчев“ – Струмица, Василево;
2. Бојанка Џипунова Ташова (македонски јазик) во ООУ „Васил Главинов“ – Велес;
3. Вера Зороска (физика, наставник-советник) во ООУ „Христо Узунов“ – Охрид;
4. Оливера Шиклеска Грозданова (информатика) во ООУ „Ѓорѓи Сугарев“ – Битола;
5. Благица Чатлеска (англиски јазик) во ООУ „Гоце Делчев“ – Прилеп.

IV. Средно образование

• Никола Делевски (професор по физика) во Регионалниот центар за стручно образование „Никола Карев“ – Струмица.

V. Постхумно признание

• Признанието за просветен работник на годината постхумно му се доделува на истакнатиот професор по математика, Слаѓан Станковиќ – Битрак, кој остави неизбришлива трага со својата работа во СОУ „Наце Буѓони“ – Куманово и „Прва математичка гимназија“ – Скопје.