ХАОС НА ШПАНСКАТА ГРАНИЦА: Најмалку 18 загинати во масовен обид на мигранти да влезат во Сеута

Европската Унија се соочува со една од најжестоките мигрантски кризи на својата африканска граница. Најмалку 18 лица го загубија животот, а илјадници други извршија силен притисок врз шпанската енклава Сеута во текот на изминатата ноќ. Ситуацијата е алармантна, а Шпанија веќе испрати армиски и засилени полициски сили за да воспостави контрола врз границата.

Според извештаите на шпанската државна телевизија ТВЕ, само во четвртокот помеѓу 2.000 и 3.000 лица успеале нелегално да ја преминат границата и да влезат во енклавата, користејќи ја секоја можност – од прескокнување на заштитните огради до пливање по море.

Судири со полицијата и водени топови

На мароканската страна од границата, во градот Фнидек, безбедносните сили употребија водени топови во обид да ги растераат толпите, главно составени од млади луѓе, жени, деца и мигранти од Супсахарска Африка. Сцените од теренот се драматични: во близина на преминот се гледаат изгорени автобуси и оштетени возила, остатоци од жестоките судири меѓу мигрантите и полицијата.

Мароко ги засили контролите на сите патни правци и железнички станици кон северот, но притисокот не стивнува. Се претпоставува дека масовното движење е поттикнато од дезинформации дека Шпанија ги отворила границите за влез без документи.

Воена мобилизација и политички притисок

Како одговор на кризата, шпанскиот премиер Педро Санчез денеска итно заминува за Сеута. Претседателот на енклавата, Хуан Хесус Вивас, упати драматичен апел до Мадрид веднаш да се прогласи вонредна состојба, тврдејќи дека досегашниот институционален одговор е целосно недоволен за обемот на кризата.

Притисокот се префрли и врз другата енклава, Мелила, каде граничниот премин Бени Ензар е веќе затворен поради обидите за насилен влез.

Најголема криза по 2021 година

Локалните медиуми со загриженост констатираат дека сегашниот бран би можел да го надмине црниот рекорд од 2021 година, кога за краток период 10.000 мигранти влегоа на шпанска територија. Иако постои договор меѓу Мадрид и Рабат за забрзано враќање на нелегалните мигранти, протоколот на терен воопшто не ги одвраќа илјадниците луѓе кои во текот на ноќта масовно купуваа опрема за пливање за да ја заобиколат копнената ограда.

Ситуацијата дополнително се усложнува по најавите за програмата за легализација на 500.000 нелегални мигранти во Шпанија, за која интересот е двојно поголем од предвидениот, што за многумина е дополнителен мотив за опасниот пат кон Европа.