Советот на Град Скопје го одби предлогот за временски автобуски билет, превозот останува во колапс

Иницијативата на политичката партија Левица за воведување на временски автобуски билет во Скопје не помина на седницата на Советот. Советниците од редовите на ВМРО-ДПМНЕ и коалицијата ВРЕДИ гласаа против предлогот со кој се бараше еден купен билет да биде валиден 120 минути по првото отчукување.

Од Левица реагираат дека со ваквото решение значително би им се олеснило на граѓаните, овозможувајќи им да менуваат повеќе автобуски линии за истата цена, што е вообичаена практика во поголемиот дел од европските метрополи. Според партијата, одбивањето на овој предлог е на штета на буџетот на граѓаните, кои и онака добиваат неквалитетна услуга.

Додека се дебатира за цената и траењето на билетите, состојбата со јавниот превоз во главниот град станува сè поалармантна. Скопје и понатаму се соочува со сериозен недостиг на возила, откако последниот тендер за набавка на нови автобуси повторно пропадна, оставајќи ги граѓаните да чекаат на нередовни линии во застарен возен парк.

Градоначалникот на Скопје, Орце Ѓорѓиевски, неодамна најави продолжување на проектот за Брз автобуски превоз (БРТ) како стратешко решение за градот. Сепак, неговата целосна реализација се очекува да трае неколку години.

Дотогаш, скопјани остануваат без краткорочно решение за секојдневните проблеми со превозот, а политичките препукувања во Советот на Град Скопје продолжуваат да го блокираат воведувањето на олеснувања за патниците.