НАТО ПЛАНИРА НАМАЛУВАЊЕ НА ТРУПИТЕ НА КФОР: Стабилна безбедносна состојба во Косово или притисок од Вашингтон?

Врховната команда на сојузничките сили во Европа (SHAPE) денеска објави дека НАТО ќе започне со постепено прилагодување и намалување на бројот на војници во рамки на мисијата КФОР во Косово. Одлуката се темели на проценката дека безбедносната состојба во земјата во моментов е „општо стабилна“.

Според официјалното соопштение, промената на бројноста на контингентот ќе се одвива етапно во текот на наредната година. Дека овој процес е веќе започнат, говори и фактот што НАТО уште во јануари го прекинал ротирачкото испраќање на резервни сили во регионот.

Во сенка на американската воена политика

Иако Алијансата не прецизираше кои држави први ќе ги повлечат своите трупи, аналитичарите овој потег го поврзуваат со постојаните инсистирања на САД за намалување на нивното воено присуство на европскиот континент. САД моментно учествуваат со околу 600 војници во вкупниот контингент од 4.600 припадници на КФОР, во кој партиципираат 31 земја.

Мисијата, која трае од 1999 година, беше засилена со дополнителни 1.000 војници во 2023 година по серијата инциденти со српски паравоени групи во северниот дел на Косово.

Бундестагот го продолжи мандатот на германските трупи

Паралелно со најавите за намалување од Брисел, германскиот парламент вчера донесе одлука за продолжување на мандатот на своите војници во регионот. Бундесверот, кој е дел од КФОР веќе 27 години, ќе продолжи со својот ангажман во Косово со горна граница до 400 војници.

Германија го потврди и своето учество во мисијата на ЕУ, ЕУФОР Алтеа, во Босна и Херцеговина. Германскиот контингент од 50 војници ќе продолжи со надзорот врз почитувањето на Дејтонскиот мировен договор, со цел одржување на мирот и стабилноста во оваа земја.

Иако вкупниот број на војници на КФОР ќе се намалува, челниците на НАТО уверуваат дека Алијансата останува целосно посветена на одржувањето на безбедна средина и гарантирањето на јавниот ред и мир за сите граѓани на Косово.