НОВ ШОК НА БЕРЗИТЕ: Цената на нафтата скокна за 5% по запленувањето на ирански брод и обновата на блокадата
Надежта за стабилизација на енергетскиот пазар кратко траеше. Цените на суровата нафта денеска нагло пораснаа за повеќе од 5%, откако серија инциденти во Ормускиот Теснец, вклучително и американската заплена на ирански товарен брод, ги подгреаја стравувањата дека договореното примирје е на раб на колапс.
По петочниот пад од 9%, кој беше поттикнат од најавите за деблокада на стратешкиот премин, пазарите денеска реагираа со нов ценовен шок. Фјучерсите на нафтата „Брент“ пораснаа за 5,62%, достигнувајќи цена од 95,46 долари за барел, додека американската лесна нафта (WTI) се тргуваше по 88,86 долари, што е зголемување од речиси 6%.
Кревко примирје и нови воени тензии
Иако американскиот претседател Доналд Трамп претходно изјави дека Иран ветил трајно отворање на теснецот, реалноста на теренот е поинаква. Само 24 часа по објавата за слободен премин, Корпусот на Исламската револуционерна гарда (ИРГЦ) наводно отворил оган врз неколку танкери, што предизвика паника кај шпедитерите.
Дополнителна ескалација се случи во неделата, кога САД соопштија дека заплениле ирански товарен брод кој се обидел да ја пробие блокадата. Техеран веднаш најави одмазда и потврди дека нема да учествува во втората рунда мировни преговори што требаше да започнат пред истекот на двонеделното примирје.
„Основите на пазарот се влошуваат бидејќи меѓу 10 и 11 милиони барели нафта дневно остануваат блокирани. Најавата за отворање на теснецот се покажа како прерана“, смета Саул Кавоник, раководител на истражување во „MST Marquee“.
Пазарите под влијание на социјалните мрежи
Аналитичарите предупредуваат дека пазарот на нафта во моментов повеќе реагира на осцилирачките објави на социјалните мрежи од двете страни, отколку на фактичката состојба.
„Сопствениците на бродови сега ќе бидат двојно повнимателни. Никому не му е дојден лесно да се упати кон теснецот без цврсти гаранции дека најавениот премин е навистина безбеден“, додава Кавоник.
Иако податоците на „Kpler“ покажаа дека во саботата низ теснецот поминале повеќе од 20 бродови со нафта и метали – што е најголем број од почетокот на март – новите непријателства сугерираат дека овој проток на енергенси повторно би можел да биде целосно прекинат.