ИЈЗ со препораки за празниците: внимавајте на исхраната, алкохолот и пиротехниката

Од Portal На 31 Dec, 2025 во 20:00 часот.

Новогодишните празници носат промени во секојдневниот ритам и често доведуваат до нарушување на вообичаениот распоред на исхрана, предупредува Институтот за јавно здравје (ИЈЗ). Според нив, доцните и обилни празнични оброци, зголемениот внес на алкохол и употребата на пиротехнички средства можат да имаат сериозни последици по здравјето и безбедноста.

Од ИЈЗ појаснуваат дека во вечерните и ноќните часови се намалува метаболичката активност, што го зголемува ризикот од нарушена регулација на шеќерот во крвта, складирање на масти, проблеми со сонот и дигестивни тегоби. Долгорочно, ваквите навики се поврзуваат со дебелина, кардиоваскуларни заболувања и дијабетес тип 2.

Препораки за исхрана за време на празниците

Последниот поголем оброк да биде најмалку 3–4 часа пред легнување.
Доколку вечерата е доцна, да се избира храна со пониска енергетска вредност.
Да се избегнува масна, пржена и силно зачинета храна.
Да се внимава на големината на порциите и да не се комбинираат повеќе калорични јадења.
По оброкот да не се легнува веднаш, туку да се направи кратка прошетка.
Меѓу празничните денови да се одржува редовен распоред на оброци.
Лицата со хронични заболувања да бидат особено внимателни.

Алкохол – умереност и одговорност

ИЈЗ апелира на умерена консумација на алкохол и избегнување прекумерно и брзо пиење.

Никогаш не управувајте возило под дејство на алкохол.
Комбинирајте алкохол со храна и редовно пијте вода.
Внимавајте на интеракции со лекови.
Бремените жени, малолетниците и лицата со хронични болести да не консумираат алкохол.
При симптоми на алкохолна интоксикација, веднаш да се побара медицинска помош.

Апел за пиротехниката

Институтот предупредува дека петардите и пиротехничките средства претставуваат сериозен ризик:

Да не се користат од деца и малолетници.
Никогаш да не се ракува со пиротехника под дејство на алкохол.
Да не се активира повторно неексплодирано средство.
Да се има предвид влијанието на бучавата врз децата, постарите лица и домашните миленици.
При повреди или пожар, веднаш да се повикаат надлежните служби.

Од Институтот за јавно здравје им посакуваат на граѓаните среќна, мирна и здрава Нова 2026 година, со апел празниците да се поминат одговорно и со грижа за здравјето.