Ахмети: Кој си оди поради функции – нека си оди, ДУИ ќе инсистира на уставни измени и национален договор за развој

Лидерот на ДУИ, Али Ахмети, изјави дека не ги смета за сериозни реакциите на поединци кои останале надвор од партиските структури по одржувањето на петтиот Конгрес на ДУИ, оценувајќи дека станува збор за „две или три лица“.

На брифинг со медиумите, Ахмети посочи дека Абдил Селам Селами се извинил и останува дел од партијата, порачувајќи дека незадоволството поради нефункционерски позиции не е причина за политичка криза.

„Оние кои си одат затоа што немаат функции – нека си одат“, рече Ахмети.

Национален договор за развој

Според лидерот на ДУИ, партијата ќе се залага за национален договор за развој, бидејќи граѓаните, како што оцени, се уморни од дневна политика која служи за партиски интереси.

„Кога имавме храброст да го направиме Охридскиот договор, Преспанскиот договор и договорот за добрососедство со Бугарија, зошто да немаме и национален договор за развој со најдобрите експерти во земјата“, истакна Ахмети.

Уставни измени и двојно мнозинство

Ахмети повтори дека уставните измени остануваат услов за учество на ДУИ во управувањето со државата. Тој побара:

избор на Влада со двојно мнозинство

примена на Бадентеровиот принцип и во Уставниот суд

Охридскиот рамковен договор, според него, не е совршен бидејќи е компромисен, но остава простор за унапредување доколку се појави потреба.

Критики и политички пораки

Ахмети упати критики и кон двете стопански комори, обвинувајќи ги дека создаваат поделби и ги штитат олигарсите.

„Нема никој во Македонија кој знае подобро од мене како се прави национализам. Јас ја уништив Југославија и 20 години го спроведував проектот 1981–2001“,

рече Ахмети, додавајќи дека неговиот говор на Конгресот не бил насочен против ВМРО-ДПМНЕ, СДСМ или ВЛЕН.

Тој нагласи дека план А останува развојот и напредокот на државата, изразувајќи надеж дека нема да дојде до „план Б“.

„Ако излезам на улица, никогаш нема да се вратам дома. Јас не сум претставник на мачки, туку на лавови“, додаде Ахмети.

Коалициски односи и локални избори

Во однос на коалицијата НАИ, Ахмети изјави дека договорот со Тачи не му штети на Фронтот, додека за Зијадин Села оцени дека во крупните прашања е дел од коалицијата, но се обидува да изгради сопствен политички идентитет.

Тој изрази сомнеж дека Села ќе го поддржи Невзат Бејта за градоначалник на Гостивар, додавајќи дека „тајни договори брзо излегуваат на виделина“.

Тематски конгрес напролет

На крајот, Ахмети најави дека ДУИ напролет ќе одржи тематски конгрес, на кој ќе се водат разговори со партиската база, по што ќе биде донесена одлука за идната идеологија на партијата.