Каракачанов ги покани македонските новинари на прес-конференција во Благоевград

Почесниот претседател на бугарската политичка партија ВМРО-БНД, Красимир Каракачанов, упати јавна покана до повеќе македонски новинари, уредници и медиумски куќи за учество на прес-конференција и отворена дискусија. Настанот е закажан за следната среда, на 17 јуни 2026 година.

Дискусија за македонско-бугарските односи

Според објавата на Каракачанов, средбата е замислена како слободен разговор и дискусија на која ќе се коментираат сите актуелни политички теми, со посебен акцент на односите меѓу Скопје и Софија.

„На средбата ќе бидат коментирани сите актуелни политички теми, нашите односи со Северна Македонија, како и сите ваши прашања кои ве интересираат и кои постојано ми ги поставувате задочно во вашите медиуми и емисии“, стои во неговата порака.

Локација и детали за настанот

Настанот ќе се одржи во Благоевград, а како прецизни детали за времето и локацијата се наведени:

• Датум: 17 јуни 2026 година (среда)

• Време: 12:00 часот

• Локација: Клуб на ВМРО-БНД -Благоевград

Поканата е адресирана до претставници на повеќе македонски медиуми, меѓу кои телевизиите Канал 5, Алфа, порталот Инфомакс, како и до новинарите Васко Ефтов, Иван Мирчевски, Горан Момировски, Александар Митовски, Саше Ивановски и нивните соработници. Покрај нив, Каракачанов упати отворен повик и до сите останати заинтересирани новинари и медиумски работници од Македонија, со барање да го потврдат своето присуство.