УХМР издаде Жолт хидроаларм: Можни локални поплави на 26 и 27 ноември

Управата за хидрометеоролошки работи (УХМР) издаде Жолто ниво на предупредување (Хидроаларм) за потенцијална опасност од поплави низ целата територија на државата, за периодот од 26 до 27 ноември 2025 година.

Според официјалната хидролошка карта, најголем дел од Македонија е во жолта зона – што означува „потенцијално опасно“ ниво. Поради најавените врнежи постои ризик од излевање на локални реки и водотеци, особено во нивните горни и средни текови.

Зголемена внимателност се препорачува во западните, југозападните, северните и североисточните региони. Жителите во близина на речни корита и подрачја склони на поплави се повикуваат да бидат претпазливи и да ги следат насоките на надлежните служби.

Дел од територијата, означен во зелено, засега е без забележан ризик, но состојбата континуирано се следи.

УХМР апелира до граѓаните и локалните самоуправи да преземат превентивни мерки – навремено чистење на одводите, заштита на имотот крај реки и избегнување движење низ потенцијално поплавени подрачја. Јавноста ќе биде редовно информирана доколку дојде до промена на хидролошката состојба или потреба од подигање на нивото на аларм.