Осудениот директор од „Дурмо Турс“ во бегство – распишана централна потерница по наредба на Судот

Ремзи Мифтари, поранешниот директор задолжен за превоз во компанијата „Дурмо Турс“, осуден за тешката автобуска несреќа кај Ласкарци, и официјално е во бегство. Неговата фотографија е објавена во делот „Потраги“ на веб-страницата на Министерството за внатрешни работи, а по наредба на Основниот суд Гостивар е распишана централна потерница за негово спроведување на издржување на казната затвор.

Мифтари е осуден на 10 години затвор за тешки дела против безбедноста на луѓето и имотот во сообраќајот. Тој беше второобвинет во случајот познат како „Дурмо Турс“ – несреќата кај Ласкарци од 2019 година, во која загинаа 16 лица, а над 30 беа повредени. Сопственикот на компанијата, Дурмиш Белули, доби четири години затвор, возачот 14 години, а вкупната казна за шестемина обвинети достигна 39 години затвор.

И покрај тоа што пресудата стана правосилна, Мифтари со месеци го одложуваше заминувањето во затвор, доставувајќи медицинска документација за здравствени проблеми и операција на кила. Според МВР, полициски службеници неодамна се обиделе да го спроведат во КПУ „Идризово“, но не го пронашле на неговата адреса – по што судот издал наредба за потерница.

Граничната полиција нема евиденција за негов излез од државата, што отвора сомнеж дека се крие во земјата. МВР соопшти дека се преземаат мерки за негово лоцирање и приведување, но не открива детали за оперативните активности.

Бегството на осудено лице во случај со 16 човечки жртви повторно ги отвори прашањата за функционирањето на системот и ефикасноста на институциите при спроведување на правосилните судски одлуки. За семејствата на загинатите во трагедијата кај Ласкарци, распишаната потерница е уште еден болен потсетник дека правдата често се соочува со административни пречки, медицински одложувања и доцни реакции од надлежните.