Обилните врнежи предизвикаа поплави и оштетувања низ повеќе општини во земјава
Обилните врнежи што ја зафатија државата во изминатите денови создадоа сериозни проблеми на повеќе локации, покажува утринскиот извештај на Регионалните центри за управување со кризи (РЦУК). Најкритична е состојбата во преспанскиот регион, каде делови од селата Царев Двор и Дрмени се поплавени по излевањето на реките Болнска и Источка.
Според РЦУК – Битола, водата навлегла во над 50 домаќинства, магацински објекти, визби и земјоделски површини. На терен работат екипи од јавни претпријатија и приватни компании со механизација: четири багери, седум големи пумпи и дополнителни приватни пумпи за извлекување вода. На регионалните патишта има земјени наноси кои се расчистуваат според приоритетите.
Нивото на Голема Река достигнало 2,1 метри, со почетни излевања во Долна и Горна Бела Црква. ЈКП „Пролетер“ информира дека е нарушен квалитетот на водата, која привремено не се препорачува за пиење. Противпожарната единица од Ресен интервенира во село Дрмени со две возила и пет пожарникари.
Состојба во Битолскиот регион
Општина Битола пријавува повеќе интервенции во подпелистерските села Нижеполе, Дихово, Цапари, Породин, Жабени, Лажец, Меџитлија, Острец, Граешница и Кишава.
ЈП „Нискоградба“ и АД Водостопанство работат на подигање насипи на реката Драгор кај Долно Оризари, додека на мостот кај Карамани се чистат гранки и отпад за да се овозможи подобар проток.
ХМС „Стрежево“ ги расчистува пропустите на Цапарска Река, а целата механизација е ангажирана и ќе остане на терен и во текот на ноќта.
Поради вода на коловоз, затворени се патиштата Лера–Доленци и правецот кон Цапари.
Нивото на реката Црна е значително покачено и во 15:30 часот изнесувало 2,7 метри.
ЈКП Водовод – Битола работи на дефект што предизвика прекин на водоснабдувањето во населбите од Кравари до Меџитлија.
Преку Е-112 се пријавени поплавени подруми и дворови, паднато дрво и ризични канали.
Демир Хисар, Прилеп и други региони
Во општина Демир Хисар има излевање на реката Црна кај селото Жван, со поплавени земјоделски површини. Локалните служби расчистуваат одрони на патиштата Базерник и Вирово, кои се проодни.
Во Прилеп, преку Е-112 е пријавен паднат таван во куќа на улицата „Кајмакчалан“, како последица од долготрајните врнежи.
РЦУК – Охрид информира за повеќе интервенции на поплавени домови. По престанокот на дождот состојбата се стабилизирала, но речните водотеци и понатаму се на високо ниво.
Во Крива Паланка и Кратово екипите расчистуваат одрони на регионалните патишта. Иако водостоите на Кратовска и Крива Река се зголемени, засега нема излевања.
Според РЦУК – Скопје, нивото на реките во скопскиот регион е покачено, но состојбата е под контрола.
РЦУК – Струмица пријавува три одрони на патот Струмица–Валандово, за кои веднаш се известени надлежните служби.