Романија подигна борбени авиони по упад на дрон во нејзиниот воздушен простор

Романското Министерство за одбрана соопшти дека денес биле подигнати борбени авиони откако дрон навлегол околу осум километри во романскиот воздушен простор за време на руски напад врз украинската инфраструктура во близина на границата.

Романија, членка на ЕУ и НАТО со околу 650 километри граница со Украина, и претходно се соочува со паѓање на фрагменти од руски дронови на нејзина територија, како последица од нападите врз украинските пристаништа на Дунав.

Според Министерството, радарите го детектирале дронот во близина на селата Периправа и Чилија Вече во округот Тулча. Сигналот накратко исчезнал, по што повторно се појавил дванаесет минути подоцна во областа на округот Галаци.

Романија подигнала два германски „Eurofighter“ кои моментално ја извршуваат мисијата за воздушен надзор, како и две романски „F-16“ летала. Жителите на округите Тулча и Галаци биле предупредени да побараат засолниште.

Досега нема информации дека дронот паднал на романска територија.