ЕУ подготвува укинување на правилото за увоз без царина до 150 евра – удар за нарачките од Тему, Шеин и Али Експрес

Советот за економски и финансиски прашања на Европската унија иницира измени на царинската регулатива со кои би се укинало сегашното правило за ослободување од царински давачки при увоз на стоки од трети земји во вредност до 150 евра.

Според предлогот на министрите за финансии, мерката треба да биде усвоена во најкус можен рок, за да може да стапи во сила уште во текот на 2026 година.

Со промените, граѓаните на ЕУ ќе мора да плаќаат царини за секоја нарачка од популарните кинески платформи за е-трговија, како Тему, Шеин или Али Експрес, без разлика на вредноста на пакетот.

Во моментов, сите пратки до 150 евра пристигнати од Кина преку овие сајтови се ослободени од царински давачки.

Ова правило требаше да биде укинато дури по стапувањето во функција на новиот Царински центар на ЕУ – централизирана дигитална платформа за соработка меѓу царинските управи и подобрена контрола на увозот. Центарот се очекува да стане оперативен во 2028 година, како дел од широка реформа на царинската рамка на Унијата.

Сепак, Советот предлага процесот да се забрза поради растечките проблеми на европските трговци.

Во објаснувањето на иницијативата, Советот наведува дека целта е создавање „еднакви услови“ меѓу европските и странските трговци на мало, бидејќи сегашното правило им дава значителна предност на кинеските е-трговски платформи.

Според податоците на Европската комисија, во 2024 година 65% од 4,6 милијарди пратки што влегле во ЕУ биле без царина – а 91% од нив биле стоки од Кина нарачани преку онлајн платформите.

Европските продавачи предупредуваат дека ова ја поттикнува нелојалната конкуренција, додека институциите посочуваат дека масовното испраќање на евтини пратки отвора и дополнителни прашања за еколошкиот отпечаток и контролата на квалитетот.

Предлог-измените сега треба да бидат формално разгледани од институциите на ЕУ, по што ќе следи усвојување и утврдување на точниот датум на применување.