Администрацијата на Трамп го затвора унгарскиот огранок на Радио Слободна Европа — подарок за Орбан пред посетата на Белата куќа

Кари Лејк, лојален поддржувач на движењето МAGA и директорка на Агенцијата за глобални медиуми на САД (USAGM), планира да го затвори унгарскиот огранок на Радио Слободна Европа (РСЕ), медиум финансиран од Конгресот. Одлуката се толкува како гест кон унгарскиот премиер Виктор Орбан, сојузник и пријател на Доналд Трамп.

Во писмо испратено во средата до републиканскиот конгресмен Марио Дијаз-Баларт, Лејк наведе дека администрацијата на Трамп ќе ги повлече средствата за унгарската редакција на РСЕ, позната и како Сабад Европа. Таа наведе дека програмата „ја поткопала надворешната политика на претседателот Трамп“, бидејќи критички се однесувала кон „законски избраниот премиер Виктор Орбан“.

Одлуката доаѓа само два дена пред закажаната посета на Орбан на Белата куќа, што дополнително ги зајакна сомнежите дека станува збор за политички мотивиран потег.

Политикологот Рон Линден, во напис за The Hill објавен во март, предупреди дека замолчувањето на Радио Слободна Европа е „подарок за автократите“, бидејќи ги лишува граѓаните во потиснати општества од објективни и независни информации.

Иако Лејк во писмото тврди дека намалувањето е дел од поширока стратегија за „немешање во односите со сојузници на НАТО“ и дека слични мерки ќе бидат преземени и во други земји, критичарите сметаат дека станува збор за директен обид за задоволување на Орбан, познат по своите авторитарни политики и блискоста со Трамп.

За посетата на Вашингтон, Орбан пристигна со голема делегација, меѓу кои има министри, директори на компании, новинари, истражувачи и провладини инфлуенсери, а за патувањето бил изнајмен чартер лет на компанијата „Wizz Air“.

Оваа одлука на Вашингтон, велат аналитичарите, испраќа загрижувачка порака за независноста на медиумите и може да има долгорочни последици за кредибилитетот на американската поддршка за слободата на изразување во Источна Европа.