(од минута во минута) Локални избори во Косово: Демократската партија прогласи победа, Српска листа води скоро на сите места со мнозинско српско население
22:52 / Според Централната изборна комисија на Косово, до овој момент Српската листа ги освоила градоначалничките места во општините: Клокот, Партеш, Ранилук, Звечан, Зубин Поток, Штрпце, Ново Брдо, Грачаница.
22:30 / Лидерот на Алијансата за иднината на Косово, Рамуш Харадинај, им се заблагодари на сите што придонесоа, како што изјави, за историскиот резултат на партијата и оцени дека изборниот процес бил успешен и демократски.
22:15 / Генералниот секретар на Демократската партија на Косово, Вљора Читаку, изјави дека партијата освоила најмногу општини без да оди во вториот круг на изборите. На прес-конференцијата по затворањето на гласачките места, Читаку рече дека ДПК „е победник на овие избори“.
Според Централната изборна комисија (ЦИК), на територијата на Косово навремено биле отворени 938 избирачки центри со вкупно 2.625 избирачки места. Право на глас имале 2.025.105 граѓани.
На гласачките места избирачите добиле две ливчиња: едното, жолта боја, е наменето за избор на градоначалници, а другото, сино, содржи имиња на политичките субјекти кои учествуваат на изборите за општинските собранија.
На изборите учествуваат вкупно 93 сертифицирани политички субјекти – 32 политички партии, две коалиции, 32 граѓански иницијативи и 27 независни кандидати.
По завршувањето на изборниот процес во 21:00 часот претседателот на Косово, Албин Курти во изјава за медиуми рече дека изборите се успешни, а Косово е зрела демократија.
Косовската полиција објави дека оперативниот план за обезбедување на локалните избори е успешно спроведен на целата територија на Косово, благодарение на меѓуинституционалната соработка, ангажманот на полициските службеници и дисциплината на граѓаните. Полицијата истакна дека се евидентирани само помали инциденти, кои не влијаеле на текот на изборниот процес.