НОВ ЦЕНОВЕН УДАР: Горивата драстично поскапуваат, дизелот достигна скоро 100 денари
Регулаторната комисија за енергетика (РКЕ) донесе одлука за ново, значително зголемување на цените на нафтените деривати. Од денеска, возачите ќе плаќаат поскап бензин за три денари, додека цената на дизелот бележи уште поголем скок од четири и пол денари по литар.
Според новиот ценовник на РКЕ, малопродажните цени на горивата изнесуваат:
- Еуросупер БС-95: 93,00 денари за литар (поскап за 3,00 ден.)
- Еуросупер БС-98: 95,00 денари за литар (поскап за 3,00 ден.)
- Еуродизел (Д-Е V): 98,50 денари за литар (поскап за 4,50 ден.)
Драстичен скок и кај маслото за домаќинство
Покрај горивата за транспорт, сериозно зголемување има и кај Екстра лесното масло за домаќинство (ЕЛ-1). Неговата цена порасна за пет денари и отсега ќе се продава за 98,00 денари за литар.
Малопродажната цена на мазутот М-1 НС исто така бележи нагорен тренд. Тој поскапува за 2,726 денари и новата цена ќе изнесува 48,099 денари за килограм.
Ова е втора последователна одлука за зголемување на цените во кус период, што дополнително го зголемува притисокот врз буџетот на граѓаните и транспортниот сектор. Од РКЕ наведуваат дека корекциите се должат на континуираниот раст на цените на нафтените деривати на светските берзи и движењето на курсот на денарот во однос на доларот.