Пронајдени уште три тела кај врвот Околчица, поврзани со случајот „Петрохан“ – бројот на жртвите се искачи на шест
Бугарската полиција официјално потврди дека се пронајдени три тела во реонот на врвот Околчица, во близина на Враца, кои се поврзуваат со мистериозниот случај „Петрохан“. Според првичните информации, пронајдените лица во голема мера одговараат на описот на исчезнатите Ивајло Калушев, Николај Златков и 15-годишно момче.
Со ова, бројот на жртвите во сложениот криминален случај се зголеми на вкупно шест.
Директорот на Главната дирекција „Национална полиција“, главен комесар Захари Васков, изјави дека станува збор за истрага „без преседан“.
„Пронајдени се три прострелани тела и возило – камп-приколка, по кое трагавме во рамки на случајот ‘Петрохан’. Утврдено е дека пукотниците биле испукани од внатрешноста на возилото, без траги од надворешен напад“, изјави Васков, додавајќи дека се разгледуваат сите можни верзии, вклучувајќи убиство и самоубиство.
Телата биле пронајдени во камп-приколка, за која претходно постоеле информации дека ја управувал Ивајло Калушев. Возилото било лоцирано на околу 7 до 8 километри внатре во планинскиот предел, откако случаен минувач пријавил во полиција.
Информациите беа официјално соопштени на заеднички брифинг на раководството на „Национална полиција“ и Обласната дирекција на МВР – Враца.
Што е познато досега за случајот „Петрохан“?
Истрагата започна на 2 февруари, кога беше пријавено дека во планинска хижа кај превојот Петрохан се пронајдени тела на тројца мажи. Еден ден подоцна, телата на мажи на возраст од 45, 50 и 51 година беа откриени во и околу полуизгорениот планинарски дом „Петрохан“, по сигнал до бројот 112, упатен од мајката на една од жртвите.
Сите тројца биле застрелани, а кај нив биле пронајдени огнено оружје и голем број чаури. Локалните власти информираа дека жртвите престојувале подолг период во домот, која била силно обезбедена со огради, бариери, камери и дронови.
Подоцна беше соопштено дека убиените се меѓу основачите на невладината организација „Национална агенција за контрола на заштитените територии“ – формално нерегистрирана како државен орган и без лиценца за обезбедување, иако со години дејствувала вооружено во планинските региони.
Истрагата утврди дека организацијата имала склучено рамковен договор со Министерството за животна средина и води во 2022 година, кој подоцна бил еднострано раскинат поради нејасен правен основ и сомнежи за незаконско пренесување на контролни функции.
Надлежните институции проверуваат и информации за евентуално присуство на малолетни лица, како и индиции дека организацијата функционирала како затворена заедница со елементи на секта.
Продолжува истрагата
Полицијата соопшти дека активната потрага по сите лица поврзани со активностите на организацијата продолжува и дека се работи по сите можни верзии. Од МВР апелираат до граѓаните, роднините и пријателите на исчезнатите да достават каква било информација што може да помогне во расветлување на случајот.
Надлежните најавуваат дека дополнителни информации ќе бидат соопштени откако ќе завршат форензичките анализи и увидите на терен.