Џејмс Харден: Клиперс треба да се обноват, во Кливленд гледам шанса за титула

Ветеранот во НБА-лигата, Џејмс Харден, ја објасни одлуката да го напушти тимот на Лос Анџелес Клиперс и да ја продолжи кариерата во Кливленд Кавалирс.

Триесет и шестгодишниот кошаркар беше разменет во Кливленд, каде Клиперс во замена добија плејмејкер – Дариус Гарланд и избор во втората рунда на НБА-драфтот.

Во изјава за „ESPN“, Харден истакна дека заминувањето било донесено со цел да не се загрози иднината на тимот од Лос Анџелес.

– Не сакав да ја загрозам иднината на Клиперс. Им треба простор и време за правилна обнова и можност повторно да градат преку драфтот. Кливленд го гледам како реална шанса за освојување на Источната конференција. Имаат одличен ростер, квалитетен тренерски штаб и стабилна организација. Колку и да сакав да останам во Лос Анџелес, верувам дека моите шанси за успех се поголеми во Кливленд – изјави Харден.

Харден оваа сезона настапи на 44 натпревари во регуларниот дел од шампионатот, при што бележеше просек од 25,4 поени, 4,8 скока и 8,1 асистенции по натпревар.

Со неговото доаѓање, Кливленд добива исклучително искусен лидер во борбата за врвот на Истокот, додека Клиперс започнуваат нова фаза на тимска реконструкција.