Силна експлозија пред банка во Солун, причинета материјална штета

Силна експлозија што се случи во текот на ноќта пред филијала на банка во населбата Евсомос во Солун предизвика материјална штета на околните згради и на неколку паркирани возила, јави дописничката на МИА од Атина.

Од експлозијата нема повредени лица, а според првичните информации, не ѝ претходел предупредувачки повик или какво било друго известување.

Како што пренесува државната телевизија „ЕРТ“, детонацијата била толку силна што се слушнала и на оддалеченост поголема од еден километар. Најмалку седум паркирани автомобили, како и објекти во непосредната околина, претрпеле значителна материјална штета.

Грчката полиција започна истрага за утврдување на околностите на инцидентот, а на терен интервенира и специјалната единица за деактивирање експлозивни направи.