Тачи упати ултиматум до Ахмети: Документ за поделба на Македонија не постои, ќе поднесам тужба во име на Арбен Џафери

Лидерот на Демократската партија на Албанците (ДПА), Мендух Тачи, упати остра реакција до претседателот на ДУИ, Али Ахмети, демантирајќи ги тврдењата за постоење на наводен документ кој предвидувал поделба на државата. По повод годишнината од смртта на Арбен Џафери, Тачи ги нарече ваквите изјави невистинити и штетни конструкции.

„Инструирани идеи од српската УДБА“

Тачи децидно тврди дека документ со таква содржина никогаш не бил составен, ниту од страна на државните академици, ниту од покојниот Арбен Џафери. Според него, идејата за поделба била надворешен инженеринг наменет за дестабилизација.

„За поделбата на Македонија не постоел документ. Тоа беше идеја на неколку псевдоакадемици, инструирани од српската УДБА. Ниту Академијата на науките стоеше зад тоа, ниту пак Арбен Џафери поседувал таков документ. На Али Ахмети тогаш службите му сугерираа дека ова е патот по кој може да го урне политичкото организирање на Албанците, и оттука неговите неповрзани тврдења“, изјави Тачи.

Најава за судска разрешница

Претседателот на ДПА упати и директно предупредување до лидерот на ДУИ за можни правни последици доколку не престане со пласирање на овие тврдења во јавноста.

„Го предупредувам уште еднаш: ако продолжи да зборува на овој начин, ќе поднесам тужба во име на Арбен Џафери. Ваквите тешки обвинувања врз ликот и делото на Џафери се недозволиви“, порача Тачи.

Овој вербален дуел меѓу двајцата политички лидери дополнително ги заострува односите во албанскиот политички блок, отворајќи дебати за настани од поновата македонска историја кои сè уште предизвикуваат спротивставени толкувања.