БЕСПЛАТНИ УНИФОРМИ ЗА СРЕДНОШКОЛЦИТЕ: Град Скопје со нова мерка за еднаквост во образованието

Со цел да се унапреди еднаквоста меѓу младите и да се обезбедат подобри услови за образовниот процес, Град Скопје воведува мерка за доделување бесплатни униформи за сите ученици запишани во прва година во средните училишта под негова надлежност.

Оваа иницијатива, како што информираат од градската администрација, има повеќеслојно значење. Примарната цел е да се намалат видливите социјални разлики меѓу учениците и истовремено да се олесни финансискиот товар врз семејните буџети, кој е особено изразен на почетокот на секоја учебна година.

„Сакаме да придонесеме кон создавање училишна средина во која знаењето, трудот и успехот ќе бидат единствените критериуми што ги издвојуваат учениците. Секој средношколец заслужува да се чувствува прифатено, почитувано и еднакво во својата околина“, се наведува во соопштението на Град Скопје.

Од Градот додаваат дека вложувањето во вакви социјални мерки во образованието е всушност вложување во иднината на целото општество. Со воведувањето на униформите, покрај економското олеснување, се очекува и зајакнување на чувството на припадност кон образовните институции.

Оваа мерка е дел од пошироката програма на Град Скопје за поддршка на учениците и модернизација на средното образование во главниот град.