Форд го произведе последниот „Фокус“ по 27 години

По речиси три децении производство, во саботата од фабриката на „Форд“ излезе последниот примерок од легендарниот модел „Фокус“, ставајќи крај на една од најпрепознатливите европски автомобилски линии. Ова е првпат „Форд“ да остане без традиционален семеен автомобил во својата понуда, откако купувачите се насочуваат кон кросовери и теренски возила.

Прекинот на производството беше најавен во 2022 година, а фотографиите и потврдите од фабриката ги споделија вработени на социјалните мрежи. „Фокус“ е вториот голем модел што го напушта понудата на „Форд“ по повлекувањето на „Фиеста“ во 2023 година.

Со ова, освен „Мустанг“ и комерцијалните возила, „Форд“ де факто станува бренд ориентиран кон теренци. На пазарот сега доминира „Пума“, најпродаваниот „Форд“ и најпродаван автомобил во 2025 година во Европа. Празнината од заминувањето на „Фокус“ засега ја пополнуваат електричните модели „Explorer“ и „Capri“, а компанијата најави уште еден нов семеен SUV.

„Фокус“ во 1998 година беше револуционерен во однос на моделот „Ескорт“, носејќи современ дизајн и супериорно возачко искуство. Во 1999 година ја освои титулата Европски автомобил на годината. Иако следните генерации не го повторија истиот шок-ефект, моделот остана омилен избор меѓу семејствата и возачите кои бараат динамика.

Иако повеќе не може да се купи како нов, „Форд Фокус“ ќе продолжи да биде популарен половен автомобил уште долго време.